VIONGOZI WA WAFANYABIASHARA WAJENGEWA UWEZO KUHUSU SHERIA NDOGO ZA BIASHARA

Posted on: October 15th, 2024

Mkuu wa Idara ya viwanda, uwekezaji na biashara Manispaa ya Ubungo Bi.Mary Mwakyosa mapema  tarehe 15 oktoba,2024 amekuta na viongozi wa wafanya biashara kutoka  katika masoko 13 ya Manispaa ya Ubungo nakuwapa elimu ya umuhimu wa kufata sheria,taratibu na miongozo ya sheria za biashara na kuwasisitiza wanapokutana na wafanyabiashara katika masoko yao waweze kuwapa elimu hiyo

Akizungumza na viongozi wa wafanyabiashara hao Mwakyosa amewataka kuelewa umuhimu wa kutambua sheria hizo ambazo zitawaongoza wanapokuwa katika shughuli zao za kila siku masokoni na kuwaagiza wanapokuwa na changamoto zozote ambazo zinahusiana na soko ikiwemo uchakavu wa miundombinu wawasilishe kwa meneja wa soko hilo kwani ndio kiongozi anayestahili kupokea na kuwasilisha kwa mkurugenzi

Ameendelea kuwataka viongozi wa soko kutojihusisha na migogoro masokoni bali wawe mstari wa mbele katika kutatua changamoto

"nyinyi ni viunganishi kati ya Serikali na wafanyabiashara lazima mkawe mstari wa mbele katika kuweka mahusiano mazuri" amesisitiza Mwakyosa

Akizungumza katika kikao hicho afisa biashara Musa Mkelenga amewataka viongozi wa wafanya biashara hao kuendelea kuwa wavumilivu ambapo Halmashauri inaenda kuchukua hatua za haraka katika kuhakikisha masoko yote yanafanyiwa maboresho ya miundombinu mbalimbali ili kuweka mazingira safi katika masoko hayo

Nae mwenyekiti wa machinga Wilaya ya Ubungo Ndg. Ibrahim Mriri amewataka kuwa na mahusiano mazuri baina yao na viongozi wa serikali na kusimamia sheria, kanuni na taratibu za biashara wakiwa sokoni