WAFANYAKAZI HODARI UBUNGO WATUNUKIWA VYETI, FEDHA TASLIMU

Posted on: May 1st, 2024

Leo  ikiwa ni siku ya Wafanyakazi duniani,  watumishi wa Manispaa ya Ubungo wameshiriki kwenye sherehe hizo zilizofanyika  kimkoa katika uwanja wa Uhuru jijini Dar es salaam ambapo watumishi hodari wametunukiwa vyeti vya pongezi na fedha taslimu  kutambua utendaji wao  bora wa kazi.

Maadhimisho ya Siku ya mei mosi 2024, yenye kaulimbiu isemayo "nyongeza ya mishahara ni msingi wa mafao bora na kinga dhidi ya hali ngumu ya maisha" ambapo watumishi wanategemea maboresho makubwa ya maslahi ikiwemo kuongezewa misharaha na kusughulikia kikokotoo ambacho kimekuwa kilio cha watumishi wengi.

Akihutubia watumishi hao Mgeni rasmi wa maadhimisho hayo Mhe. Albert Chalamila Mkuu wa mkoa wa Dar Es Salaam, amewapongeza watumishi  kwa kufanya kazi kwa bidii na weledi mkubwa kwa maendeleo ya Taifa na kueleza kuwa serikali ya awamu ya sita kwa kipindi cha miaka 3 imeendelea kuboresha maslahi ya watumishi ikiwemo upandishwaji wa vyeo kwa watumishi, hivyo changamoto zilizobainishwa na wafanyakazi hao zitashughulikiwa

Aidha, Mhe. Chalamala amewakumbusha wafanyakazi kuwa wakati serikali inashughulikia maslahi yao ni vema wakatambua kuwa kudai haki kunaenda sambamba na uwajibikaji hivyo wafanye kazi kwa bidii na ufanisi mkubwa katika nafasi zao ambazo wameaminiwa ili kuliletea taifa maendeleo