WAGANGA WAFAWIDHI WAPEWA SIKU TANO KUWACHUKULIA HATUA WALIOSABABISHA UPOTEVU WA DAWA

Posted on: May 5th, 2021

Mganga Mkuu wa Manispaa ya Ubungo Peter Nsanya awapa siku tano  wakuu wa  vituo  vya  kutolea huduma za afya vilivyobainika kuwa na upotevu wa dawa kutoa maelezo ya waliohusika ikiambatana na mikakati ya kurejesha fedha hizo mara moja

Mganga Mkuu ametoa Kauli hiyo leo tarehe 5 Mei, 2021 kwenye kikao  kazi kilichohusisha  waganga wafawidhi wa vituo, wafamasia, wataalamu wa maabara na wauguzi kutoka vituo 20 vilivyofanywa ukaguzi wa dawa na vitendanishi na kukutwa na upotevu wa bidhaa hizo

Nsanya amesema kumekuwa na kawaida ya wahudumu wa afya kutofuata utaratibu  wa uwekaji wa taarifa sahihi wakati  utoaji  wa bidhaa za dawa na vitendanishi kwa wateja hali inayopelekea kukosa mtiririko mzuri wa taarifa za  bidhaa zilizopokelewa na zilizotumika.

Wataalamu wa afya kutoka vituoni.

"Nawapa siku tano Hadi kufikia tarehe 10 mwezi huu kila Mkuu wa kituo awe ameleta taarifa ya alivyochukua hatua Kwa waliosababisha upotevu huo poja na mikakati ya kurejesha fedha hizo atakayyeshindwa kufanya hivyo atachukuliwa hatua yeye kwa kushindwa kuwajibika kama kiongozi mkuu wa kituo "  aliagiza Nsanya.

Akisoma taarifa ya ukaguzi maalumu wa bidhaa za afya  Kwa kipindi cha mwezi julai hadi disema 2020, mfamasia wa Manispaa hiyo Magreth Mlai alisema katika ukaguzi upotevu wa dawa ulikuwa eneo la stoo , dawa zilizochina na bidhaa zilizozidi ambapo kwa eneo la stoo pekee  kulikuwa na upotevu wa    bidhaa za afya zenye zaidi ya thamani ya shilingi milioni 66 huku dawa zilizochina au kuisha muda wa matumizi kuwa na thamani ya zaidi ya shilingi milioni 10

Mfamasia wa Manispaa ya ubungo akiwasilisha taarifa ya ukaguzi 

Mlai alisema baada ya ukaguzi timu iligundua kuwa sababu kubwa iliyopelekea kuwepo Kwa upotevu mkubwa wa bidhaa hizo ni kutotumia vizuri mfumo wa GotHomis pamoja kutotumia ipasavyo nyenzo za kutunzia kumbukumbu za matumizi ya bidhaa hizo.

"Tumieni nyenzo za utunzaji taarifa za bidhaa kuanzia stoo hadi hatua ya kumpa mteja hakikisha unaandika ili kuwa na taarifa sahihi za matumizi ya bidhaa hizo kwenye kituo" alisisitiza Mlai

Wakiongea Kwa nyakati tofauti wataalamu hao kutoka kwenye vituo vya kutolea huduma za afya wameahidi kutekeleza agizo hilo ikiwa ni pamoja na kuzingatia utaratibu wa utoaji dawa na vitendanishi ili kuondoa tatizo la upotevu ambalo limejitokeza katika kipindi hiki.