WAJANE WASHAURIWA KUANZISHA MIRADI YA MAENDELEO KUJIKWAMUA KIUCHUMI

Posted on: July 26th, 2025

Wanawake wajane katika Halmashauri ya Manispaa ya Ubungo wamehimizwa kuanzisha Vikundi na miradi mbalimbali ya ujasiriamali ili kujikwamua kiuchumi na kuendeleza kikundi chao cha wajane bila kutegemea tu misaada.

Rai hiyo imetolewa na Mlezi wa wajane Manispaa ya Ubungo Bw. Kawina Fonde wakati akizungumza katika kikao kazi kilicho wakutanisha  viongozi wa wajane wilaya ya Ubungo.

Amesema lengo ni  kulikomboa kundi hilo dhidi ya changamoto za ukatili wa kijinsia, vikwazo vya kiuchumi, kukifufua chama chao na kukifanya kuwa na nguvu zaidi, kuwaondolea dhana potofu ya kutoweza ili kuepuka utegemezi, na kuwajengewa uwezo wa kujiamini na kustahilimili changamoto zao kuepuka msongo wa Mawazo.

Vilevile, amewataka wanawake wajane kuanzisha miradi midogomidogo kupitia vikundi vyao walivyovisajili ili viwasaidie kwenye matumizi sahihi ya fedha zinazotolewa na wadau mbalimbali zenye lengo la kuwezesha wanawake hao wajane.

“Kama mwanamke mjane akiwa kwenye vikundi hivi itamsaidia kujenga uwezo wa kujiamini, kujikimu kiuchumi na kuimarisha afya ya akili inayoweza kusababishwa na msongo wa mawazo,” amesema Kawina.

Kwa upande wake Mratibu wa dawati la wanawake Manispaa ya Ubungo Bi. Hilda Malosha amesisitiza juu ya kila mjane kujitambua wenyewe kwa kujituma ikiwemo kuzitambua fursa zilizopo kwenye maeneo yao kama kilimo ili kuweza kujikwamua huku akiomba viongozi wa serikali za mitaa kuwatambua wanawake wote wajane wanaokaa katika mitaa yao ili iwe rahisi hata zinapotokea fursa kuweza kuwashirikisha.

“Kupitia vikundi ni rahisi wafadhili kuwawezesha kwa mitaji kwaajili ya miradi mtakayobuni kutekeleza. Pia ni rahisi hata kupata elimu ya usimamizi na matumizi sahihi ya fedha za vipato vyenu,” amesema Bi. Malosha"- Amesema Malosha