WAJAWAZITO KITUO CHA AFYA MBEZI, WAPATIWA ELIMU YA UPUNGUFU WA DAMU.

Posted on: December 12th, 2023

Manispaa ya Ubungo kupitia Kitengo cha Lishe  tarehe 12/12/2023 imetoa elimu ya kukabiliana na changamoto ya upungufu wa damu kwa wajawazito ndani ya Kituo cha afya cha Mbezi lengo ikiwa ni kuwawezesha kuepukana na madhara yanayosababishwa na upungufu wa damu kwa wajawazito.

Akielezea madhara ya upungufu wa damu  Afisa Lishe wa Manispaa hiyo Onesmo Mwaisyungu ameeleza kuwa upungufu wa damu kwa wajawazito unapelekea kuzaa watoto wenye uzito pungufu, upungufu wa maumbile yaani kuwa na kichwa kikubwa, mdomo sungura, mgongo wazi na kupelekea vifo kwa watoto hao lakini pia wajawazito hao hupoteza damu nyingi wakati wa kujifungua.

Onesmo ameendelea kueleza kuwa, kutokana na madhara hayo Manispaa imeamua kuandaa programu ya kutembelea vituo vya kutolea huduma za afya na kufundisha wajawazito namna bora ya kutengeneza juisi za kuongeza damu ikiwemo juice ya beetroot, rozela na tembele.

Aidha, Onesmo ameeleza kuwa beetroot ina faida zaidi ya 19 ikiwemo madini chuma, inawezesha kutozeeka mapema, inaimarisha ngozi na inapunguza presha ya kupanda na ameeleza kuwa juisi hiyo inashauliwa kunywa glasi mbili tu kwa siku na kwa matokeo mazuri zinapaswa kunywa asubuhi kabla ya kula kitu chochote huku akisisitiza kwa wenye changamoto ya figo hawaruhusiwi kunywa juisi hiyo.

Sambamba na hayo Onesmo ameeleza kuwa wakati wa kutengeneza juisi hizo ni vizuri kuchanganya na pasheni au chungwa au limao au apple au zabibu lakini pia kuongeza na karoti kwenye juisi ya beetroot na zisizidi siku mbili tangu siku ya kutengenezwa na kuhifadhiwa kwenye friji kwa ajili ya matumizi.

Nae Afisa lishe Zulfa Mshitiri akielezea dalili za upungufu wa damu kwa wajawazito hao amesema ni uchovu uliopitiliza, kuishiwa nguvu, kuishiwa pumzi, kupauka ngozi, matatizo ya nywele na kucha na kuvimba miguu, mikono na uso.

Zulfa amewataka wajawazito hao kuwahi kituo cha kutolea huduma za afya mara waonapo dalili hizo huku akiwasisitiza kuhudhuria kliniki ya mama wajawazito, kula vyakula vyenye wingi wa madini chuma na vitamini C lakini pia kunywa dawa za virutubishi ili kuwawezesha kuepukana na madhara ya upungufu wa damu.