WAKAZI WA KATA YA MANZESE WAFIKIWA NA ZOEZI LA AFYA CHECK

Posted on: September 11th, 2024

Mapema  tarehe 11/9/2024 zoezi la upimaji wa afya bure limewafikia wananchi wa Kata ya Manzese ambapo huduma ya upimaji wa magonjwa mbalimbali imetolewa  na zoezi hilo ni  kwa muda wa siku mbili mpaka kesho tarehe 12/9/2024 na linafanyika katika Zahanati ya Manzese

Akizungumza katika zoezi hilo, Diwani wa kata hiyo Mheshimiwa Eliam Manumbu amewakaribisha wananchi wote wa kata hiyo kupata huduma za upimaji wa magonjwa mbalimbali bure ikiwemo magonjwa ya sukari, saratani ya tezi dume, magonjwa ya moyo, saratani ya shingo ya kizazi (wanawake), kupima macho na kupewa miwani bila malipo na kueleza kuwa kupima afya ni kipaumbele kikubwa kwani afya njema husaidia katika utendaji kazi mzuri

Aliendelea kueleza kuwa kwa kata ya manzese zoezi hili limekuwa likifanyika mara kwa mara na nia kubwa ni kusaidia wananchi hasa katika magonjwa yasiyo ya kuambukiza ambayo yamekuwa yakitesa jamii sana hivyo lengo ni kuwasogezea huduma hii kwa wepesi na wapate vipimo bure

Aziza hussein Katibu wa umoja wa wanawake Wilaya ya Ubungo amempongeza Mheshimiwa diwani wa kata hiyo kwa kuwa na utamaduni wa kufanya zoezi hilo mara saba mfululizo kwa kuwasaidia wananchi wa kata hiyo kupata matibu kwani afya nzuri ni mtaji mkubwa

Aliendelea kwa kutoa Pongezi kwa Rais wa Jamhuri ya Muungano wa Tanzania kwa kuendelea kusimamia na kuboresha  Idara ya afya na pia kuendelea kutoa ajira kwa wataalam wa afya lengo likiwa ni kuwasaidia watanzania kupata matibabu na pia amewasisitiza watanzania kuwa na tabia ya kupima afya mara kwa mara

Nae mwananchi wa kata hiyo bi. Mwanaisha Nurdini amesema kuwa wanajivunia huduma hiyo ambayo Mhe.diwani wa kata hiyo amewaletea na kumshukuru kwa kuwezesha zoezi hilo kwani limeenda kusaidia watu wote wenye kipato cha chini kupata matibabu bure