WAKUU WA IDARA NA VITENGO UBUNGO WAPEWA ELIMU YA MASUALA YA AFYA YA AKILI.

Posted on: August 21st, 2023

“Unywaji wa pombe kupita kiasi, msongo wa mawazo na uvutaji wa sigara ni moja kati visababishi vya matatizo ya afya ya akili kwa watu wengi” 

Kauli hiyo imetolewa tarehe 21/08/2023 na mtaalamu wa masuala ya afya ya akili Dkt. Isaac Lema alipokuwa akielezea masuala hayo kwa wakuu wa Idara na Vitengo Manispaa ya Ubungo lengo ikiwa ni kuwapa uelewa juu ya athari na namna ya kusaidia changamoto za afya akili sehemu za kazi.

Lema ameendelea kueleza kuwa pombe ina kiwango maalamu cha mtu kunywa na kikizidi kiwango hicho basi ni rahisi kumpelekea mtumiaji kupata tatizo la afya ya akili kutokana na uraibu wa unywaji wa pombe hizo.

Akifafanua Lema ameeleza kwa wanywaji wa pombe kwa upande wa wanawake hawatakiwi kuzidisha chupa 2 za pombe kwa siku na zisizidi chupa 10 kwa wiki, na wanaume wasinywe pombe zaidi 3 kwa siku na zisizidi 15 kwa wiki huku wakizingatia namba ya kiwango cha kilevi cha pombe husika pamoja na mapumziko ya siku mbili kila wiki bila kunywa pombe huku wajawazito wakizuiliwa kunywa pombe hizo.

Aidha, Lema ameendelea kueleza kuwa madhara ya matatizo ya afya ya akili yanaathari mbaya sana kwa Taifa na mara nyingi hupelekea mwenye tatizo hilo kupoteza maisha hivyo ni jukumu la kila mmoja kuelimisha jamii juu ya masuala ya afya ya akili.

Kwa upande wake Mganga Mkuu wa Manispaa hiyo Dkt. Tulitweni Mwinuka amempongeza Mtaalamu huyo kwa elimu hiyo muhimu aliyoitoa ambayokwa kiasi kikubwa itawezesha watumishi wa Manispaa hiyo kupata msaada juu ya masuala ya afya ya akili na ameeleza kuwa Idara ya afya kwa kushirikiana na wadau mbalimbali itahakikisha wananchi wa Manispaa hiyo wanapata elimu hiyo yenye tija na manufaa kwa Taifa.

Sambamba na hilo Dkt. Mwinuka ametoa wito kwa wataalamu waliopata elimu hiyo kuwa mabalozi wakuhakikisha matatizo ya afya ya akili hayatokei na yanazuiliwa sehemu za kazi.