WALIMU WA SHULE ZA MSINGI UBUNGO WAPEWA MAFUNZO ELEKEZI YA MTAALA ULIOBORESHWA

Posted on: January 16th, 2024

Ikiwa ni mwendelezo wa Mafunzo elekezi kuhusu Mtaala ulioboreshwa mashuleni, Walimu wa  Shule za msingi Manispaa ya Ubungo wamepatiwa mafunzo hayo lengo likiwa ni kuwapitisha  na kuwawezesha  walimu kutambua maboresho yaliyofanyika katika Mtaala na kuwawezesha kwenda kutekeleza shuleni.

Mafunzo hayo yametolewa kwa walimu wa Kata zote 14  zilizopo katika Manispaa hiyo  na utekelezaji wa mafunzo hayo unaanza na darasa la awali, darasa la kwanza na darasa  la tatu

Akizungumza na walimu wanaopatiwa mafunzo hayo, Afisa Elimu Msingi Manispaa ya Ubungo Dennis Nyoni amesema kuwa, mafunzo hayo endelevu ya walimu kazini (MEWAKA) yana dhumuni la kuhakikisha wanapata elimu kuhusu mabadiliko yoyote yanayotokea katika  mwongozo mpya wa elimu ulioboreshwa ili kila mmoja akatekeleze majukumu yake kwa weledi

Niwaombe mkazingatie kuwafundisha wanafunzi waweze kukuza ujuzi zaidi katika mambo mbalimbali ili waweze kujitegemea na kumudu mazingira yao kwa ujumla. Alisisitiza Nyoni

Nyoni, ameendelea kuwasisitiza walimu hao kuhakikisha kila mmoja anazingatie mafunzo hayo na kila mmoja kuzingatia kuwa ana jukumu la kuwalea watoto wakiwa mashuleni kwa kuwalinda na kuhakikisha wanapewa elimu na wanakuwa kiakili.

Akitoa shukrani kwa niaba ya walimu wenzie,  Davis Mbachao ameomba mafunzo yaendelee kutolewa mara kwa mara ilikukuza uwezo wa ufundishaji  na kuwaongezea ujuzi zaidi.