WALIMU WAKUBORA NGAZI YA SHULE WANOLEWA KUTUMIA MFUMO WA KIDIJITI WA UTHIBITI UBORA WA SHULE.

Posted on: July 22nd, 2025

Wakuu wa shule na wathibiti ubora ngazi ya shule halmashauri ya manispaa ya Ubungo wameatiwa mafunzo ya kutumia mfumo wa kidijiti wa uthibiti ubora wa shule (School Quality Assurance System - SQAS) ili kuwawezesha kutekeleza majukumu yao kwa ufanisi mkubwa.

Akifungua mafunzo hayo ya siku tatu yaliyohusisha washiriki zaidi ya 300, Afisa Elimu Mkoa wa Dar es salaam Mwl. Gift Kyando, amesema mfumo huo utarahisisha utendaji kazi na upatikanaji wa taarifa sahihi na kwa wakati.

Aidha amesema ubora wa elimu ni msingi wa maendeleo ya taifa, akisisitiza kuwa serikali imeanzisha mfumo huu ili kuongeza ufanisi, uwazi, uwajibikaji na kuimarisha ukusanyaji, uchambuzi, na utoaji wa mrejesho wa tathmini za shule kwa wizara na wadau wa elimu ambapo pia Mfumo huu utawezesha utunzaji na uchakataji wa taarifa kwa urahisi na kwa wakati.

Ofisa Mthibiti Ubora Mkuu wa Shule, Halmashauri ya Manispaa ya Ubungo Mwl. Margareth Kihiyo amesema kuwa mfumo huu utasaidia kuboresha utendaji wa kazi zao kwa kupunguza matumizi ya fomu za karatasi, ambazo zilihitajika kujazwa kuanzia ngazi ya shule hadi wilaya ili kufanya tathmini ya shule.

“Hapo awali, mfumo huo ulikuwa na changamoto katika kuchakata takwimu kwa ujumla, lakini sasa taarifa zote zitakuwa zinapatikana moja kwa moja kwenye mfumo, hivyo kurahisisha tathmini na kuhakikisha ubora wa shule unaimarika” amesema Mw. Kihiyo

Ameeleza kuwa mafunzo hayo ni muhimu na yanapaswa kutekelezwa kwa ufanisi ili kufikia malengo yaliyokusudiwa kwa mafanikio makubwa.

Mfumo huu wa kidijiti ulijengwa baada ya kufanya mazungumzo na wathibiti ubora wa shule ili kuelewa namna wanavyotekeleza majukumu yao ambapo sasa unatarajiwa kuleta mapinduzi makubwa katika uthibiti ubora wa shule, kuhakikisha taarifa zinapatikana kwa haraka na kusaidia katika kufanya maamuzi sahihi kwa maendeleo ya elimu nchini.