WANANCHI ZAIDI YA 200,000 WANUFAIKA NA KAMPENI YA MSAADA WA KISHERIA YA MAMA SAMIA

Posted on: June 21st, 2025

Imeelezwa kuwa zaidi ya wananchi 200, 000 katika halmashauri ya Manispaa ya Ubungo wamenufaika na kampeni ya Msaada wa Kisheria ya Mama Samia (Mama Samia Legal Aid) iliyoanzishwa mwaka 2023 ikiwa ni wiki moja tu tangu kuzinduliwa kwa kampeni hiyo katika Mkoa wa Dar es salaam Juni 16, 2025 katika uwanja wa Maturubai, Mbagala – Wilaya ya Temeke.

Akizungumzia kampeni hiyo, Bi. Scolastica Maliti kutoka wizara ya Katiba na Sheria ambaye pia ni mratibu wa kampeni hiyo Halmashauri ya Manispaa ya Ubungo amesema kuwa toka kuanza kwa kampeni hiyo Juni 16, 2025 mwitikio umekuwa ni mkubwa kutoka kwa wananchi huku akibainisha kuwa Lengo kuu la Kampeni ni kulinda na kukuza upatikanaji wa haki kwa wote kupitia huduma ya msaada wa kisheria nchini.

Bi. Maliti amesema katika kufikia lengo hilo, kampeni inaongeza uelewa wa kisheria na haki za binadamu kwa jamii hususan haki za wanawake na watoto; Inatoa  huduma ya  ushauri  wa kisheria na unasihi kwa waathirika na manusura wa ukatili wa kijinsia; kuongeza uelewa kwa wananchi kuhusu  elimu ya sheria,  masuala ya  haki na wajibu na misingi ya utawala bora.

Aidha amewahimiza wakazi na wananchi wa Wilaya ya Ubungo kujitokeza kwa wingi ili kupata huduma za msaada wa kisheria bure.

“Kampeni hii imejikita katika kuhakikisha kuwa huduma za kisheria zinawafikia wananchi moja kwa moja katika maeneo yao ya karibu, bila gharama yoyote, na kuongeza usawa katika upatikanaji wa haki hususani katika masuala ya ukatili wa kijinsia, migogoro ya ardhi, mirathi, usuluhishi wa migogoro kwa njia mbadala, na masuala yahusuyo haki za binadamu kwa ujumla. Utekelezaji wa kampeni unafanyika kwa kushirikiana na Wizara na Taasisi za Serikali, Asasi za Kiraia, Wanazuoni na Wadau wa Maendeleo” Alisema

Hata hivyo pia amesema, katika kuhakikisha kuwa msaada wa kisheria unakuwa endelevu kwa wananchi, Serikali pia imeanzisha madawati ya msaada wa kisheria kwenye mamlaka 184 za serikali za mitaa Tanzania bara, lengo likiwa ni kusogeza huduma na kukuza uendelevu wa msaada huo wa kisheria hata baada ya kampeni hii kuhitimishwa.