WASILISHO LA MATOKEO YA SENSA YA WATU NA MAKAZI 2022 WILAYA YA UBUNGO

Posted on: July 7th, 2023

Timu wa wataalamu kutoka Ofisi ya Taifa ya Takwimu (NBS) ikiongozwa na Meneja Takwimu Bw. Albert Kapala Julai 07,2023 imetembelea Wilaya  ya Ubungo kwa lengo la kuwasilisha matokeo ya sensa ya watu na makazi ya mwaka 2022 ngazi ya Wilaya ikiwa ni moja ya malengo ya sensa hiyo katika kuhakikisha takwimu hizo zinawafikia wahusika katika ngazi zote ili ziwasaidie katika mipango mbalimbali ya maendeleo.

Uwasilishaji huo ulihusisha Mkuu wa Wilaya, Katibu Tawala wa Mkoa, Katibu Tawala Wilaya, Meya, Mkurugenzi, Mbunge wa jimbo la Ubungo, Kamati ya Ulinzi na Usalama ya Wilaya, Wataalamu kutoka Manispaa, Watendaji wa Kata na Mitaa pamoja na Wenyeviti wa Mitaa.

Akifungua uwasilishaji huo Mgeni Rasmi Bi. Beatrice Mbawala Katibu Tarafa wa Kibamba kwa niaba ya Mkuu wa Wilaya hiyo, alielezea umuhimu wa Takwimu hizo Kitaifa, Kimataifa, Kimkoa na Kiwilaya katika mipango mbalimbali ya maendeleo na utoaji huduma kwa Wananchi kwa kuangalia mahitaji.

Katika Sensa hiyo idadi ya watu kwa Mkoa wa Dar es Salaam ni watu 5,383,728 na kwa Wilaya ya Ubungo ni watu 1,086,912 kati yao Wanaume ni 519,925 na Wanawake ni 566,987.

Ikumbukwe kuwa zoezi hilo la Sensa lilihusisha hatua tatu. Hatua ya kwanza ilikuwa kuandaa maeneo ya kuhesabia (EA), hatua ya pili ilikuwa kuhesabu watu na sasa ni hatua ya mwisho ni uwasilishaji wa matokeo hayo kwa wadau mbalimbali ili yawasaidie katika kutekeleza majukumu yao.