WATENDAJI NGAZI YA JIMBO WAPEWA MAFUNZO UBUNGO YA UBORESHAJI DAFTARI LA KUDUMU LA WAPIGA KURA

Posted on: March 10th, 2025

Mafunzo ya zoezi la maboresho ya daftari kudumu la wapiga kura kwa watendaji ngazi ya jimbo yamefunguliwa na Afisa Muandikishaji wa Halmashauri ya Manispaa ya Ubungo Ndg. Lawi Mgongo  leo March 10, 2025 katika Ukumbi wa Manispaa ya Ubungo yakiwa na lengo la kuwajengea uwezo wasimamizi wa zoezi hilo kwa ngazi ya Jimbo.

Akiongea na watendaji hao katika kikao hicho Lawi Amesema "kuteuliwa kwenu kunatokana na ujuzi, uwezo na weledi mlionao katika kutekeleza majukumu mbalimbali ya Kitaifa likiwemo zoezi la Uboreshaji wa Daftari ikiwa ni Maandalizi ya Uchaguzi Mkuu wa Mwaka 2025"

Ni matarajio ya Tume Huru ya Taifa ya Uchaguzi kuwa kutokana na Semina hiyo kila mmoja wenu atapata Elimu na ujuzi wa kutosha utakaomuwezesha kutekeleza majukumu yake ili kufanikisha uboreshaji wa Daftari. Aliongeza Lawi

Aidha mafunzo hayo yamehusisha mambo kadhaa ikiwemo namna ya ujazaji wa fomu pamoja  na kutumia mfumo wa kuandikisha wapiga kura.

Mafunzo haya yanawajengea umahiri wa kuwafundisha waendeshaji wa vifaa vya Bayometriki na Waandishi Wasaidizi ambao Ndio watahusika na Uandikishaji wa wapiga kura Vituoni. 

Vilevile wakati wa Uboreshaji wa Daftari mawakala wa vyama vya siasa wataruhisiwa kuwepo katika vituo vya kuandikisha wapiga kura ili kusaidia kuleta uwazi katika zoezi Zima hili pia mawakala hao watasaidia kutambua waombaji wa eneo husika hivyo kupunguza kutokea kwa vurugu zisizokuwa za Lazima.

Washiriki wameshukuru mafunzo hayo ambayo yataongeza tija kwani yanaenda kuweka mwanga katika zoezi hilo. Wameishukuru Tume kwa muongozo mzuri wenye ufanisi. 

Mafunzo kwa watendaji ngazi ya jimbo yamepangwa kufanyika kwa muda wa siku mbili ambazo ni Machi 10 - 11, 2025 kabla ya kuanza kutoa mafunzo kwa watendaji ngazi ya kata kwa siku mbili ambazo ni Machi 14 na 15, 2025

“Kujiandikisha Kuwa Mpiga Kura Ni Msingi Wa Uchaguzi Bora”