WATENDAJI WA MITAA MANISPAA YA UBUNGO WAPIGWA MSASA JUU YA MFUMO WA TAUSI.

Posted on: March 21st, 2023

Watendaji wa Mitaa Manispaa ya Ubungo wajengewa uwezo juu ya Mfumo wa ukusanyaji mapato ya ndani - TAUSI ambao ni mbadala wa mfumo uliokuwa ukitumika hapo awali wa Local Government Revenue Collection Information System “LGRCIS”

Mafunzo hayo wameyapata leo tarehe 21/03/2023 ambapo jumla ya watendaji 90 wa mitaa walipata mafunzo hayo kwa lengo la kuwaongezea weledi wa ukusanyaji wa ada na fine mbalimbali kwenye mitaa yao.

Akiongea wakati akitoa mafunzo hayo Afisa TEHAMA wa Manispaa hiyo Ndg. Aziza Lotta amesema Mfumo wa TAUSI utamuwezesha mkusanyaji wa mapato kufanya maboresho ya mfumo bila kufika halmashauri tofauti na ilivyokuwa kwa mfumo wa LGRCIS ambapo ilimlazimu mkusanyaji kufika Manispaa kwa ajili ya maboresho ya Mfumo.

Lottta ameendelea kueleza kuwa Mfumo wa TAUSI ni mfumo salama ambao utazuia matumizi ya fedha mbichi kwani Mkusanyaji hataweza kuendelea kukusanya ada yeyote hadi fedha alizokwisha zikusanya ziwe zimewekwa benki

Aidha, Lotta ameeleza kuwa Mfumo wa TAUSI utamsaidia mfanyabiashara kuweza kufanya maombi ya leseni za biashara, vileo, hotel levy, service levy na vibali vya ujenzi kwa njia ya mtandao na  kupata kumbukumbu namba ya malipo kutoka eGa itakayomuwezesha kulipa moja kwa moja kwa kutumia mtandao.

Sambamba na hilo Watendaji hao wamefundishwa namna ya kutumia POS na uwasilishwaji wa makusanyo ya benki kwa kutumia mfumo wa TAUSI ili kuwawezesha kwenye ukusanyaji wa ada za taka, ulinzi shirikishi na fine mbalimbali na hivyo kuwawezesha Watendaji hao kutumia mfumo huo kwa ufasaha.