WATOA HUDUMA ZA AFYA NGAZI YA JAMII 30 WAJENGEWA UWEZO

Posted on: July 14th, 2025

Halmashauri ya Manispaa ya Ubungo kupitia Idara ya Afya, Ustawi wa jamii na Lishe imewajengea uwezo watoa huduma ngazi ya jamii wapya 30 ili kufanikisha azma ya Mpango Jumuishi wa wahudumu hao kuendeleza afua jumuishi za Afya, Lishe na Ustawi wa Jamii.

Hayo yamebainishwa na Mratibu wa huduma ngazi ya jamii Halmashauri ya Manispaa ya Ubungo Bi. Shubira Bachuba  ambapo amewataka kuendelea na majukumu yao ya msingi ikiwa ni pamoja na kuhamasisha wananchi kujitokeza katika vituo vya kutolewa hiduma za afya kwa wakati.

"Watoa huduma ngazi ya jamii ni wahamasishaji katika ngazi ya jamii, kwahiyo wanapokutana na changamoto wao kazi yao ni kutoa rufaa kama hilo eneo hawezi kulifanyia kazi, Wasitoe huduma kama Madaktari au wauguzi" -Amesema Bi. Bachuba

Akizungumza wakati wa mafunzo hayo, Afisa Lishe wa Manispaa ya Ubungo Bi. Beatrice Mossile amesema kuwa lishe bora inaanzia kipindi mama anapokuwa mjamzito na mtoto anapofikisha miezi 6 - 24 ili kupunguza utapiamlo kwa watoto.

Bi. Mossile amesema kuwa, lishe bora inaanzia kipindi mama anapokua mjamzito kwasababu mtoto anaanza kupata chakula kupitia milo anayokula mama yake hivyo ni vyema kuzingata ulaji sahihi ili kumjenga mtoto tangu akiwa tumboni.

Akiongelea kuhusu elimu ya lishe na upungufu wa damu kwa Kina mama wajawazito Afisa lishe amesema kuwa vyakula vyenye asili ya mimea na wanyama ni muhimu kuvizingatia ikiwemo pia matumizi sahihi ya dawa za kuongeza damu wanazopewa kliniki ili kumuwezesha kujifungua mtoto mwenye afya bora.

Aidha amewasisitiza watoa huduma za afya ngazi ya jamii kuielimisha jamii juu ya umuhimu wa maziwa ya mama pekee kwa kipindi cha miezi sita kwani yanajitosheleza na yanavirutubisho vyote  anavyopaswa kuvipata mtoto.

Aidha amewaeleza watoa huduma kuelimisha jamii kuwa maziwa ya mama asilimia70 ni majimaji hivyo ile dhana ya maziwa mepesi na kuona watoto hawashibi waiondoe kwani kumuanzishia chakula mbadala katika kipindi cha miezi 6 kunaathari kubwa kwa mtoto.

"Maziwa ya Mama ni Kinga tiba, sio gharama na yanajitosheleza. Chakula mbadala kwa mtoto chini ya miezi 6 kunaweza kupelekea  kupata magonjwa sugu kama kisukari na presha"