WATU WENYE ULEMAVU, MAAFISA BIASHARA NA MAAFISA MAENDELEO WAPATIWA MAFUNZO UTOAJI MIKOPO YA ASILIMIA 10

Posted on: December 12th, 2024

Halmashauri ya Manispaa ya Ubungo kupitia Idara ya Maendeleo ya jamii, Disemba 12, 2024 imetoa mafunzo kwa Watu wenye ulemavu,  Maafifa biashara na maafisa Maendeleo kuhusu sheria za usimamizi na utoaji wa mikopo ya asilimia 10 kwa vikundi vya Wanawake, Vijana na Watu wenye ulemavu. 

Mafunzo ni mwendelezo wa mafunzo yanayotolewa na Idara hiyo kuongeza uelewa kwa Watu wenye ulemavu,  Maafifa biashara na maafisa Maendeleo kufuatia maboresho ya muongozo mpya wa utoaji mikopo ya asilimia 10.

Mikopo kwa vikundi vya Wanawake,  vijana na watu wenye ulemavu inatolewa kwa mujibu wa sheria ya fedha ya serikali za mitaa, sura namba 290, kifungu cha 37A.

Kifungu hicho kimefafanua kuwa, mamlaka za serikali za mitaa zitakuwa na wajibu wa kutenga asilimia 10 ya mapato ya ndani yasiyolindwa ya mwaka husika kwaajili ya vikundi hivyo ikiwa ni sehemu ya fedha zinazotengwa kwaajili ya shughuli za maendeleo. 

Kwa kuzingatia kifungu hicho, Halmashauri ya Manispaa ya Ubungo imetenga jumla ya shilingi bilioni 4.22  kwaajili ya mikopo hiyo ambapo taratibu za uombaji wa mikopo zimeanza.