WATUMISHI MANISPAA YA UBUNGO WAPATIWA MAFUNZO YA MFUMO MPYA WA MANUNUZI.

Posted on: September 23rd, 2023

Mfumo wa sasa wa manunuzi ujulikanao kwa jina la TANePS utafika ukomo wa matumizi yake ifikapo Septemba 30, 2023 na hivyo mfumo mpya wa manunuzi wa NeST utaanza kutumika rasmi Oktoba 1, 2023, Halmashauri zote hazitaruhusiwa kufanya ununuzi wowote bila kutumia mfumo wa NeST.

Kauli hiyo imetolewa na Ndg. Benito Kalinga Mkuu wa Kitengo cha ununuzi na ugavi Manispaa ya Ubungo alipokuwa akitoa mafunzo ya mfumo wa NeST kwa wataalamu wa Manispaa hiyo kwa kushirikiana na Sophia Kayombo Mkuu wa Kitengo cha TEHAMA  Septemba 23, 2023 ndani ya ukumbi wa Manispaa hiyo.

Kalinga ameendelea kueleza lengo la mafunzo hayo ni kujifunza jinsi ya kutumia mfumo mpya na hivyo kuhakikisha Manispaa hiyo inatumia mfumo huo katika manunuzi yote yanayotumia fedha za Umma.

Aidha, Kalinga amemshukuru Mhe.  Rais Dkt. Samia Suluhu Hassan kwa kuiwezesha wizara ya fedha ambapo ilishirikiana na PPRA katika kutengeneza mfumo huo ambao kwa kiasi kikubwa utasaidia kuongeza uwazi, ushindani na usawa katika shughuli za ununuzi na hivyo kuondoa mianya ya rushwa na kupata thamani halisi ya fedha katika ununuzi wa Umma.

Mfumo wa TANePS ulianza kutumika 2019, na baada ya kuonekana kuwa na changamoto ndipo Serikali ya awamu ya sita chini ya Uongozi wa Mhe. Rais Dkt. Samia Suluhu Hassan ikaamua kuanzisha mfumo mpya wa manunuzi wa NeST.