WATUMISHI NANE WASIMAMISHWA KAZI, KUPISHA UCHUNGUZI

Posted on: June 24th, 2022

1. Baraza la madiwani la Halmashauri ya Manispaa ya Ubungo limewasimamisha kazi watumishi nane (8) akiwemo mkuu wa idara ya maendeleo ya jamii kwa ajili ya kupisha uchunguzi wa tuhuma ya kushiriki kwenye mchakato wa ununuzi wa gari la taka ambalo limebainikia kuwa ni gari bovu la kikundi cha Energy women kilichokopeshwa shilingi milioni 70 kupitia mikopo ya 10% ya Manispaa huku kikundi hicho kikiwa kimerejesha shilingi Milioni nane tu mpaka sasa, hivyo kimetakiwa kurejesha fedha shilingi milioni 62 zilizobaki ndani ya kipindi cha mkataba.

Watumishi hao waliosimamishwa kazi ni pamoja na Rose A. Mpeleta Mkuu wa Idara ya Maendeleo ya Jamii, Allen Mjindo Afisa maendeleo ya jamii kata ya kwembe, Edger Msuya Afisa biashara, Amon Mboka Mhasibu wa Mikopo, Yusta Yongole Afisa maendeleo ya jamii kata ya mabibo, Evelyne Mangweha Afisa Maendeleo ya jamii na msajili wa vikundi, happiness Mwamakula afisa maendeleo ya jamii na mratibu wa mikopo ya vikundi na Juliana Kibonde afisa maendeleo ya jamii na msajili wa NGO’s.

Aidha, baraza limeazimia kuwa maafisa maendeleo ya jamii waliohamishwa vituo vya kazi warudi kwenye vituo vyao vya zamani ili wakasimamie marejesho ya mikopo ya vikundi kwa kipindi cha miezi mitatu na wakishindwa wachukuliwe hatua.

Baraza limewataka watumishi wote kutekeleza wajibu wao kwa kufuata Sheria, Taratibu na Kanuni ya utumishi wa umma.