WATUMISHI UBUNGO WAPIGWA MSASA WA MAADILI YA KAZI

Posted on: September 13th, 2024

Watumishi wa umma Manispaa ya Ubungo waaswa kuepuka vitendo vya rushwa na kuzingatia maadili ya kazi.

Watumishi wa Umma, Manispaa ya Ubungo wameaswa na kutakiwa kujiepusha na vitendo vya rushwa na badala yake wazingatie maadili, sheria, taratibu, na kanuni wakati wanapotoa huduma kwa umma.

Hayo yamesemwa na mkuu wa Idara ya maendeleo ya Jamii Bi. Rose Mpeleta ambaye pia ni Mwenyekiti wa kusimamia masuala yote ya maadili katika halmashauri ya Manispaa ya Ubungo wakati akimwakilisha mkurugenzi kwenye ufunguzi wa mafunzo maalum juu ya maadili na vitendo vya rushwa, yaliyofanyika leo 13/09/2024 katika ukumbi wa Manispaa ya Ubungo.

Bi. Mpeleta amesema kuwa Watumishi wa Umma wanatekeleza majukumu yao kwa niaba ya Rais kwa mujibu wa Ibara ya 35 ya Katiba ya Jamhuri ya Muungano wa Tanzania ya mwaka 1977.

“Mtumishi akila rushwa au akikiuka maadili ni fedheha kwa Serikali na kwa jamii kwa ujumla, hivyo mtumishi huyo hastahili kuendelea na utumishi wake. Tutapita kila eneo na kila Idara, Shuleni, Hospitalini na sehemu zote za halmashauri kueleza maana ya utumisi bora katika kukuza taaluma zetu, na kuhakikisha maadili ya kazi yanafuatwa katika maeneo yetu ya kazi ” Alifafanua Bi. Mpeleta

Katika eneo la rushwa, Maafisa waandamizi wa TAKUKURU Bi. Magdalena Sendasenda na Bwana Mboto Malugu wamesema mmoja kwa nafasi yake anapaswa kutekeleza wajibu wake wa kutotoa wala kupokea rushwa kwani kutoa rushwa na kupokea rushwa yote ni makosa na kwamba hakutakuwa na rushwa endapo hakutakuwa na mtoaji wala mpokeaji rushwa.

Aidha wamebainisha kuwa wajibu wa TAKUKURU kwa mujibu wa sheria na. 11 ya mwaka 2017 ni kuchunguza, kupeleleza na kupeleka mahakamani mtuhumiwa endapo atabainika na makosa hayo.

“Maslahi kidogo na marupurupu siyo kigezo cha wewe kuomba au kupokea rushwa, Epuka tama, zingatia maadili ya kazi ikiwemo Uwajibikaji kwa umma, , Matumizi sahihi ya taarifa, Bidii kzini na utii kwa serikali”-Mboto Malugu, Afisa wa TAKUKRU