WAZIRI GWAJIMA AHIMIZA UPATIKANAJI WA TAARIFA ZA WATOTO WATORO MASHULENI

Posted on: March 21st, 2024

Waziri wa Maendeleo ya Jamii, Jinsia, wanawake na Makundi maalumu Mhe. Dkt. Dorothy Gwajima ametoa wito kwa viongozi wa wilaya ya Ubungo kuhakikisha wanaanza utaratibu wa ukusanyaji wa taarifa za wanafunzi watoro mashuleni ili kupata kiini halisi cha watoto wa mitaani

Waziri Gwajima ametoa wito huo Machi 21, 2024 wakati wa ziara yake aliyoifanya ndani ya wilaya ya Ubungo iliyokua na lengo la kufatilia udhibiti wa wimbi la watoto wanaoishi na kufanya kazi mitaani

"Tatizo la watoto wa mitaani Ubungo na Dar es salaam linazidi kukua kwa kasi, lazima sisi kama jamii kwa kushirikiana na wataalamu tushirikiane kupata majawabu ya tatizo hili. Maafisa maendeleo, maafisa ustawi na viongozi wa wilaya na Halmashauri shukeni chini kwenye jamii kunyanyua hali za uchumi za wananchi ili watoto wasiache shule na kukimbilia mtaani" alisema Gwajima

Awali akiwasilisha taarifa ya watoto wa mitaani afisa ustawi wa jamii Manispaa ya Ubungo Zainab Masilamba amesema, tatizo kubwa la watoto wa mitaani kwa wilaya ya Ubungo linatokana na watoto hao kuingizwa kutoka mikoa mbalimbali kwa lengo la kuja kufanya kazi na wengine kujitafutia kipato wao wenyewe. Kwa idadi kubwa watoto hao wamekua wakiishi katika daraja la Kijazi pamoja na kituo cha Mabasi cha Magufuli

Kwa mujibu wa mpango kazi wa taifa wa kutokomeza ukatili dhidi ya wanawake na watoto (MTAKUWWA) kamati zilizopo katika ngazi ya mitaa ndizo zenye nafasi kubwa ya kufuatilia matatizo mbalimbali yanayowahusu watoto ambayo yanaathiri maisha yao moja kwa moja

Nae mkuu wa wilaya ya Ubungo Mhe. Hassan Bomboko ameshauri kufanyika kwa marejeo ya sera ya kumlinda mtoto ili kuongeza ushirikiano wa sekta na idara mbalimbali kupunguza tatizo la watoto wanaoacha shule na kufanya kazi mitaani

Aidha Bomboko ameweka wazi kuwa wao kama wilaya wanayo mikakati madhubuti ya kukabiliana na changamoto hiyo ikiwemo kuanza kufanya oparesheni za kuwaondoa watoto hao mitaani na kuwapa misaada mbalimbali ikiwemo ya makao pamoja na kuwarudisha mashuleni