WAZIRI UMMY AVITAKA VITUO VYA AFYA NCHINI KUWA NA VIPIMO VYA KISASA VYA SELIMUNDU

Posted on: October 2nd, 2023

Waziri wa Afya Mhe. Ummi Mwalimu ametoa miezi sita kwa Wilaya zote Nchini kuhakikisha vituo vyote vya afya vinakuwa na vifaa vya kisasa vya kupima ugonjwa wa selimundu kwa watoto wanaozaliwa ndani ya vituo hivyo.

Agizo hilo amelitoa  tarehe 02/10/2023 wakati wa uzinduzi wa kampeni ya kuelimisha jamii juu ya magonjwa yasiyoambukiza ambayo kitaifa uzinduzi huo ulifanyika Wilaya ya Ubungo ndani ya Kituo cha afya cha Sinza Palestina ambayo imeanza mwezi Septemba hadi Novemba 2023 inayoenda sambamba na kauli mbiu isemayo “usijisahau, pima afya yako” kwa lengo la mapambano dhidi ya magonjwa yasiyoambukiza.

Sambamba na agizo hilo Mhe. Ummi ametoa wito kwa jamii kuwa na desturi ya kupima vinasaba vya selimundu kabla kuingia kwenye ndoa ili kuwezesha watoto wao kuzaliwa salama kwani tafiti zinaonesha kuwa kati ya asilimia 70 hadi 80 ya watoto wanaozaliwa wanakufa kutokana na tatizo la selimundu na hii ni kutokana na wazazi kutojua mapema changamoto ya watoto wao pindi wanapozaliwa.

“Tanzania bila selimundu inawezekana ni jukumu letu kupambana dhidi ya magonjwa yasiyoambukiza” Alisema Ummi.

Akiongelea suala la magonjwa yasiyoambukiza Mhe. Ummi ameeleza kuwa Dunia ya sasa watu wengi wanapoteza maisha kwa kiasi kikubwa kutokana na magonjwa yasiyoambukiza ikiwemo shinikizo la juu la damu, kisukari, selimundu, kiharusi, saratani, tezi dume, magonjwa ya macho na mengineyo.

Mhe. Ummi ameendelea kueleza kuwa magonjwa yasiyoambukiza kwa kiasi kikubwa yanasababishwa na ulaji usiofaa ikiwemo matumizi ya chumvi, sukari na mafuta mengi na kutofanya mazoezi.

Kwa upande wake Mwenyekiti wa Magonjwa yasiyoambukiza Nchini Ndg. …. amesema hadi sasa kuna ongezeko la zaidi ya mara tano ya uwepo wa magonjwa yasiyoambukiza na ambayo yanapelekea kifo hivyo ametoa rai kwa wananchi kuchukua tahadhari juu ya magonjwa yasiyoambukiza kwani pia gharama za matibabu ya magonjwa hayo huwa ni makubwa.

Katika uzinduzi huo wananchi walipata fursa ya kupima na kupata ushauri juu ya magonjwa mbalimbali yasiyoambukiza, Kampeni hiyo itafanyika hadi mwezi Novemba 2023.

                                                                                                                            watoa huduma wakiwa hudumia wananchi waliokuja kupima maradhi mbalimbali