WENYEVITI SIMANIENI MAPATO, DC KOMBA UBUNGO

Posted on: February 6th, 2023

Mkuu wa Wilaya ya Ubungo Mhe. Hashim Komba amewataka Wenyeviti wa Mitaa ya Manispaa ya Ubungo kuendelea kusimamia ukusanyaji wa mapato na miradi mbalimbali ya maendeleo inayotekelezwa kwenye maeneo yao.

Maagizo hayo ameyatoa leo tarehe 06/02/2022 alipokuwa kwenye kikao kazi na wenyeviti 90 wa mitaa iliyopo Manispaa ya Ubungo kilicholenga kufahamiana na wenyeviti hao na kuboresha utendaji kazi wao.

Katika kikao hicho Wenyeviti hao wamefanikiwa kueleza changamoto mbalimbali zinazowakabili juu ya utekelezaji wa majukumu yao ambapo Mhe. Komba amewaahidi kushirikiana nao katika utatuzi wa changamoto hizo.

Sambamba na hayo Mhe. Komba amewataka Wenyeviti hao kuendelea kuimarisha mahusiano mazuri baina yao na Madiwani, Watendaji wa Kata na Mitaa, Wajumbe wa Serikali za Mitaa na Watumishi mbalimbali wa Manispaa hiyo.

Ikiwemo na kusimamia usafi wa mazingira na amewataka wataalamu wa afya kuandaa programu za ugawaji wa zawadi kwa mitaa itakayofanya vizuri juu ya usafi wa mazingira.

Akiongea Mwenyekiti wa Mtaa wa Mpiji Magohe Mhe. Saidi Selemani Biuchile kwa niaba ya wenyeviti hao amempongeza Mkuu wa Wilaya hiyo kwa kuona tija ya kuongea nao na wameahidi kuendelea kutekeleza majukumu yao kwa maslahi ya wananchi na kuyafanyia kazi maelekezo yote yaliyotolewa na Mhe. Komba.

Kwa upande wake Mkurugenzi wa Manispaa hiyo Ndg. Beatrice Dominic amewataka Wenyeviti hao kuendelea kushirikiana nae vyema katika nyanja mbalimbali kwa maslahi ya wananchi