BODI YA VILEO MANISPAA YA UBUNGO YAPITISHA LESENI 3545

Posted on: October 19th, 2023

Bodi ya Vileo Manispaa ya Ubungo imepitisha maombi ya leseni za biashara za vileo 3545  zitazoziingizia Manispaa fedha kiasi cha shilingi 123,052,000 kwa kipindi cha miezi sita kuanzia Mwezi Oktoba 2023 hadi machi 2024 ambapo kati ya hizo leseni 911 ni maombi ya  leseni  mpya.

Akiwasilisha  taarifa mbele ya Bodi hiyo,  Mkuu wa Idara ya Viwanda Biashara na Uwekezaji Ndg. Mary Mwakyosi amechanganua maombi ya leseni hizo kuwa 1903 ni za bar, grosari 1127, maduka ya jumla 504 huku leseni 11 ni kwa ajili ya pombe za kienyeji.

Aidha, Mwakyosi ameeleza kuwa katika kuhakikisha wafanyabiashara wa vileo wanafuata taratibu na sheria idara inaendelea kutoa elimu ambapo wale wanaokiuka taratibu wanachukuliwa hatua ikiwemo kulipa faini au kufungia  biashara.

Mwakyosi amesema "Changamoto kubwa kwa wamiliki wa bar ni miziki mikubwa inayosababisha kelele kwa wakazi waliokaribu na bar hizo, tumekuwa tukiwaelimisha na kuwachukulia hatua "

Wakichangia taarifa hiyo, wajumbe wamesema pamoja na kupitisha maombi hayo ya leseni, ni vema wamiliki wa bar wazingatie sheria ya kuhakikisha hawasababishi kelele hasa nyakati za usiku kwa wakazi wa jirani.

Pia, wajumbe wa Bodi hiyo wamepitisha maombi ya leseni za nyongeza  ya muda wa kufanya biashara kutoka saa 6 usiku hadi saa 9 alfajili badala ya kuishia saa sita usiku tu kama sheria ya vileo Na. 28 ya mwaka 1968 inavyoelekeza.

Wajumbe wa bodi ya vileo Manispaa ya Ubungo wakiwa kwenye kikao cha bodi ya vileo