ENG NYAMHANGA APONGEZA UJENZI WA MADARASA 9 KING'ONGO, AAHIDI FEDHA ZA UJENZI WA MADARASA MENGINE 6-8

Posted on: February 12th, 2021

Katibu Mkuu Ofisi ya Rais  Tawala  za Mkoa na serikali  za mitaa  Eng Joseph Nyamhanga ameipongeza  Manispaa Ubungo kwa kumaliza  ujenzi wa madarasa 9 katika shule ya msingi King'ongo kwa muda mfupi na kuahidi kuleta fedha za kuongeza madarasa mengine kuanzia  6 hadi 8 kutokana na shule hiyo kuwa na uhitaji mkubwa wa madarasa.

Eng. Nyamhanga ametoa kauli hizo leo februari 12, 2021 wakati alipotembelea na kukagua utekelezaji wa miradi mbalimbali katika Manispaa ya Ubungo ikiwemo ujenzi wa madarasa 9 na vyoo matundu 12 katika shule ya msingi king'ongo ikiwa ni utekelezaji wa agizo la mheshimiwa Rais  la kutaka wanafunzi wa shule hiyo kutosomea nje na kukaa chini.

"Niwapongeze kwa jitihada zenu za kufanikiwa kujenga na kukamilisha madarasa haya 9 kwa muda wa wiki tatu yaani siku 21 yakiwa na ubora na sasa wanafunzi wanatumia, endeleeni na kasi hii kwenye miradi mingine" alisema Eng Nyamhanga

madarasa mapya katika shule ya msingi King'ongo 

Akiwa kwenye Ziara hiyo Eng. Nyamhanga amesema kuwa "nimeona nipite pia kwenye shule hii nione hali ya  ujenzi, nashukuru madarasa yamekamilika na yanatumika lakini uhitaji wa madarasa  bado ni mkubwa ukilinganisha na idadi ya wanafunzi waliopo, TAMISEMI tutatoa fedha kuongeza madasara kuanzia sita hadi nane pamoja na matundu 10  ya vyoo"

Eng. Nyamhanga ameendelea kusisitiza kuwa, Serikali inatumia fedha nyingi katika kuboresha sekta ya elimu ikiwemo ujenzi wa  miundombinu ya shule yaani madarasa, madawati na matundu ya vyoo, "nawaagiza walimu mtunze miundombinu  hii ili iweze kudumu lakini pia kuhakikisha fedha ya serikali haipotei bure"

Uboreshaji wa miundombinu unaenda sambamba na kuongeza ufaulu kwa wanafunzi, Eng Nyamhanga amesema  " nimategemeo yangu shule ya msingi king'ongo ufaulu utaongezeka kwa kiasi kikubwa baada ya kupata mazingira haya mazuri ya kufundisha na kujifunzia"

Baachi ya wanafunzi wa shule ya msingi king'ongo wakiwa kwenye moja ya madarasa  mapya

Shule ya msingi King'ongo ina jumla ya wanafunzi 2520 na inahitaji vyumba vya madarasa 56, vilivyopo 16 na hivyo kufanya upungufu kuwa vyumba cha madarasa 40

Akitoa maelezo ya mkakati wa Manispaa  ya Ubungo  katika kutatua changamoto ya miundombinu ya  madarasa, madawati , viti na ,meza pamoja na  matundu ya vyoo kwa shule za msingi na sekondari , Mkurugenzi wa Manispaa hiyo Beatrice Dominic  amesema Manispaa imeshaainisha shule zenye hali mbaya zaidi kwa ajili ya kuanza ujenzi wa miundombinu hiyo ili kupunguza uhaba wa miundombinu hiyo hususani madarasa na madawati.

Beatrice amesema kwa sasa manispaa inaendelea na ujenzi wa madarasa  mnne shule ya msingi Tegeta A na  vyumba vitatu shule msingi matosa ambayo ni mpya na miradi yote iko hatua ya umaliziaji.

 baadhi ya walimu wa shule ya msingi King'ongo  wakimusikiliza katibu Mkuu alipotembelea shule hiyo leo februari 12,2021