IDARA YA AFYA UBUNGO YAWAHAMASISHA WENYEVITI WA MITAA UMUHIMU WA WAJAWAZITO KWENDA KLINIKI

Posted on: April 9th, 2024

Mapema  April 9, 2024 idara ya afya Manispaa ya Ubungo imekutana na wenyeviti wa mitaa yote 90 ya Halmashauri ya Manispaa ya Ubungo lengo ikiwa ni kuwahamasisha kushiriki shughuli mbalimbali zinazohusu masuala ya afya hasa wajawazito kuanza kliniki mapema chini ya miezi mitatu (Wiki 12) kuanzia katika ngazi ya jamii katika mitaa yao pia usafi wa mazingira ili kuepuka magonjwa ya mlipuko

Akiongea wakati wa ufunguzi wa kikao hicho mgeni rasmi mganga mkuu wa Manispaa ya Ubungo Dkt. Tulitweni Mwinuka amewapongeza wenyeviti hao kwa kufika kwenye kikao hicho huku akiweka wazi kuwa wenyeviti wa mitaa ndo nguzo kubwa ya mawasiliano na uhamasishaji wa masuala ya afya kwenye mitaa yao, hivyo wana umuhimu mkubwa kwenye uboreshaji wa afya za wananchi

"Niwaombe wenyeviti muende mkahamasishe wananchi wenu umuhimu wa mama mjamzito kuanza kliniki mapema kwaajili ya kulinda afya ya mama na mtoto, lakini pia mkashirikiane vema na maafisa afya pamoja na wahudumu wa afya ngazi ya jamii ili kwa pamoja tukomeshe ulipukaji wa magonjwa kama kipindupindu" alisema Mwinuka

Nae mratibu wa afya ya uzazi na mtoto Manispaa ya Ubungo Rehema Panga amesema kuwa, kwa mwaka 2023 Manispaa ya Ubungo wajawazito 22,381 walijifungua, vifo vya wazazi vilikua 7, vifo vya watoto wachanga vilikua 24 na watoto waliofia tumboni walikua 278. Twendeni tukahamasishe wajawazito kuanza kliniki mapema ili kwa pamoja tukomeshe utokeaji wa vifo vya mama na mtoto

Kwa upande wa mwenyekiti wa wenyeviti wa mitaa Manispaa ya Ubungo Mama Sophia Fitina amechukua fursa hiyo kuwashukuru idara ya Afya Manispaa ya Ubungo kwa uamuzi wao wa kuwaita wenyeviti na kuona umuhimu wa nafasi yao katika kuboresha afya za wananchi, aidha wenyeviti wameyapokea mafunzo hayo na kuahidi kwenda kuongeza hamasa kwa kuwashirikisha wananchi wao

Manispaa ya Ubungo ina jumla ya vituo vya kutolea huduma za afya 268, vituo vya serikali 22, vituo vya watu binafsi 246, vituo vinavyotoa huduma ya afya ya uzazi na mtoto ni 86 huku vituo vinavyotoa huduma ya uzazi salama vikiwa 29