MANISPAA YA UBUNGO YATOA MILIONI 100 KWA AWAMU YA KWANZA YA UBORESHAJI WA SOKO LA SIMU 2000. VIBANDA VIPYA NA VYA KISASA 250 KUJENGWA

Posted on: May 5th, 2023

Leo Mei 5, 2023 jitihada za kuwakwamua wafanyabiashara wadogo wadogo katika Manispaa ya Ubungo zimechukua sura mpya kufuatia kukabidhi hundi ya shilingi milioni 100 kwa wafanyabiashara wa soko la Simu 2000 ambazo zimelenga kwenda kufanya maboresho makubwa kulingana na mahitaji ya wafanya biashara hao.

Hafla hiyo imefanyika mapema leo katika eneo la kituo cha daladala cha Simu 2000 ambapo mgeni rasmi wa hafla hiyo alikua ni mkuu wa wilaya ya Ubungo Mhe. Hashim Komba.

Mapema akitoa salamu za chama cha Mapinduzi, Mwenyekiti wa chama hicho wilaya ya Ubungo Ndugu Rogat Elias Mbowe ameupongeza uongozi wa Manispaa ya Ubungo kwa kutekeleza kwa vitendo ilani ya chama cha Mapinduzi CCM 2020 - 2025 inayolenga kuwainua wafanyabiashara wadogo kwa kuwajengea mindombinu ya kisasa.

Nae mkurugenzi wa Manispaa ya Ubungo Ndugu Beatrice Dominic amewaeleza wafanyabiashara hao kuwa Serikali ina nia thabiti ya kuendelea kuimarisha miundombinu mbalimbali ya masoko kwa Manispaa ya Ubungo hivyo waendelee kuipa ushirikiano wa dhati. Aidha ameishukuru serikali ya Rais Dkt. Samia Suluhu Hassan kwa kuendelea kuleta fedha nyingi za miradi ya maendeleo kwa Manispaa ya Ubungo.

Akiongea mbele ya hadhara hiyo, mgeni rasmi wa hafla hiyo mkuu wa wilaya ya Ubungo Mhe. Hashim Komba amempongeza mkurugenzi wa manispaa ya Ubungo pamoja na timu yake ya wataalamu kwa utendaji wao mzuri.

Pia ametoa maagizo kuwa baada ya kukamilika kwa ujenzi huo, uongozi uhakikishe wafanyabiashara waliosubiri mchakato wa maboresho kukamilika ndo wawe wa kwanza kupewa vibanda.

"Serikali ya Dkt. Samia Suluhu Hassan inataka kuona mabadiliko chanya kwa wafanyabiashara wadogo wadogo. Miundombinu hii mkaitumie vizuri kujiongezea kipato na kuchangia pato la serikali kwa uaminifu mkubwa, na huo ndio uzalendo wa kweli" alisema Komba

Vile vile ametoa rai kwa wafanyabiashara wanaofanya biashara zao katika maeneo yaliyokatazwa kuwa ni vema walinde mitaji na biashara zao kwa kufanya biashara katika maeneo yaliyorasimishwa.