MIKOPO YA HALMASHAURI YACHOCHEA MAFANIKIO YA WAJASIRIAMALI

Posted on: September 30th, 2025

Mpango wa utoaji wa mikopo midogo ya asilimia 10 inayotokana na makusanyo ya mapato ya ndani kwa vikundi vya wajasiriamali katika Manispaa ya Ubungo umeendelea kuleta mafanikio makubwa ya kijamii na kiuchumi, kwa kuwawezesha wanufaika kuanzisha na kukuza biashara zao, kujiajiri, na kuongeza kipato.

Mikopo hiyo, iliyotolewa kati ya Januari na Machi 2025 imewezesha vikundi mbalimbali kuanzisha na kupanua biashara ndogo, jambo ambalo limewasaidia kujiajiri na kuboresha hali zao za maisha.

Mojawapo ya mafanikio hayo yanatokana na kikundi cha Ukurasa Mpya kilichopo Kata ya Makuburi, ambacho kinajihusisha na uzalishaji wa siagi ya karanga. Mwenyekiti wa kikundi hicho, Bi. Blandina Samuel Pima, amesema mkopo walioupata umeleta mabadiliko makubwa katika shughuli zao za kiuchumi.

"Hapo awali tulikuwa tukizalisha majumbani mwetu kwa vifaa duni. Sasa tumepata eneo rasmi la uzalishaji, tumenunua mashine za kisasa pamoja na malighafi muhimu. Kweli mkopo umetuwezesha kupiga hatua kubwa," alisema Bi. Pima akiwa katika ofisi yao mpya ya uzalishaji.

Kadhalika, kikundi cha NEH Women Group, kinachojishughulisha na usambazaji wa vyakula katika maeneo mbalimbali, kimenufaika kwa kiasi kikubwa na mkopo huo. Bi. Fatuma Issa Faru, Mhazini wa kikundi hicho, alieleza kuwa mkopo huo umeimarisha biashara yao kwa kiasi kikubwa.

"Tunaishukuru serikali kwa kutupatia mkopo huu ambao ni mkombozi mkubwa kwa biashara yetu. Tumejipanga kuhakikisha tunarejesha kwa wakati kama njia ya kuendeleza mpango huu kwa wengine," alibainisha.

Vikundi vingine vilivyonufaika na mpango huo ni pamoja na Car Body Work and Painting, Nyota Njema Group, na Genius Group, vyote kutoka Kata ya Sinza. Pia, kunavikundi vingine kutoka Kata za Kimara, Ubungo, na Saranga ambavyo vimepata manufaa kama hayo.

Afisa Maendeleo ya Jamii wa Kata ya Kimara, Bi. Ketra Mwakimi, ametoa wito kwa vikundi zaidi kujitokeza kuchukua mikopo hii kwa lengo la kujikwamua kiuchumi na kuchangia ajenda ya Serikali ya Awamu ya Sita ya kupunguza ukosefu wa ajira kwa wanawake, vijana na watu wenye ulemavu.