SOKO LA KUKU MANZESE LABORESHWA

Posted on: October 10th, 2023

Manispaa ya Ubungo imetenga jumla ya Shilingi Bilioni 1.3 kutoka kwenye mapato yake ya ndani kwa ajili ya utekelezaji wa mradi wa ujenzi wa uboreshaji wa soko la Manzese maarufu soko la kuku.

Katika uboreshaji huo Manispaa ya Ubungo imepanga kujenga fremu za kisasa kwenye ghorofa ya sakafu tatu ambapo jumla ya fremu 39 zitajengwa na hadi sasa ujenzi upo asilimia 20 na unatarajiwa kukamilika mwezi Aprili, 2024.

Akielezea ujenzi huo Ndg. Geofrey Mbwama Afisa Mfawidhi sehemu ya biashara na masoko wa Manispaa hiyo amesema Manispaa imedhamiria kujenga fremu za kisasa kwa wafanyabiashara wa soko hilo hususani wauza kuku ili kuwawezesha kufanya biashara zao kwenye maeneo rafiki yatakayovutia wateja wao na hivyo kuweza kukuza vipato vyao.

Mbwama ametoa rai kwa wafanyabiashara hao kuanza kufanya biashara zao kisasa hususani wafanyabiashara wa kuku ambapo miundombinu itakayokuwepo itawalazimu kutunza kuku kwenye majokofu mara baada ya kuchinja.

Aidha, Mbwama ameeleza kuwa uboreshaji wa soko unaenda sambamba na sheria ya upangaji miji kwa kuweka miundombinu ya kisasa ukizingatia Manzese ni “smart area” na pia ni katikati ya Mji.

Sambamba na hayo Mbwama ameeleza kuwa uboreshaji wa soko hilo pia ni moja ya mkakati wa Manispaa wa kubuni vyanzo vipya vya mapato ya ndani ili kuiwezesha Manispaa hiyo kukusanya Fedha kwa ajili ya utekelezaji wa miradi ya maendeleo ikiwemo ya sekta za elimu, afya, uboreshaji wa masoko na miundombinu mbalimbali.

Kwa upande wake Mualami Muya mfanyabiashara wa soko hilo akimshukuru Mhe. Rais Dkt. Samia Suluhu Hassan na uongozi wa Manispaa ya Ubungo kwa ujumla amesema uboreshaji wa soko hilo utasaidia wafanyabiashara wa soko hilo  hususani wauza kuku kuwa na eneo salama la kufanya biashara zao tofauti na ilivyokuwa hapo awali.

“Tunamshukuru sana Rais wetu na viongozi wetu wa Manispaa ya Ubungo kwa uboreshaji wa soko hilo na tunaahidi kuitunza miundombinu yake sambamba na utoaji wa ushuru wa soko kwa maslahi ya Manispaa yetu” alisema Mualami.

Mualami ameeleza kuwa ujenzi wa fremu zenye miundombinu ya kisasa kwa ajili ya biashara ya kuku sio tu utaboresha mazingira ya biashara lakini pia utaondoa hasara kwa wafanyabiashara pale ambapo kuku watahitajika kuhifadhiwa kwenye majokofu kwani hali ya sasa inawalazima kulipia kiasi cha Fedha ili kuhifadhi kuku wao na wakati mwengine kuku hao upotea

“Kuna muda mfanyabiashara anapata kuku kutoka Mikoani hadi wakifika mjini kuku hao wanachoka sana na ndipo itamlazimu muuzaji kuchinja kuku hao na kuwahifadhi kwenye majokofu ambayo kwa sasa tunalipia na bado mara zingine muuzaji anaweza kupoteza kuku hao kwenye majokofu hayo kiukweli tunafarijika sana na uboreshaji huu ambao utapunguza au kuondoa tatizo hili” Alisema Mualami.

Soko la Manzese Lina jumla ya wafanyabiashara 496 ambapo kati ya hao wafanyabiashara wanaouza kuku ni zaidi ya 100 huku wanaobaki wanajishughulisha na biashara za mama lishe na biashara mchanganyiko.

Pia soko la Manzese ni miungoni mwa masoko 13 ya Manispaa ya Ubungo ambalo pia ni miongoni mwa masoko manne yanayoboreshwa na Manispaa hiyo kwa mwaka wa Fedha 2023/2024 likiwemo soko la Mabibo, soko la SIMU 2000 na soko la Mbezi.