SOKO LA SIMU 2000 LA HAMASISHA WAFANYABIASHARA NDOGONDOGO.

Posted on: October 10th, 2023

“Naipongeza Serikali ya awamu ya sita inayoongozwa na Mhe. Rais Dkt. Samia Suluhu Hassan kwa jitahadi zinazofanyika za uboreshaji wa masoko ikiwemo soko la SIMU 2000 kitendo ambacho kinapelekea wafanyabiashara waliotelekeza vibanda vyao ndani ya soko hilo na kwenda kupanga kwenye maeneo yasiyorasmi kuanza kurudi sokoni”

Kauli hiyo ilitolewa na Ndg. Charles Goodluck mfanyabiashara wa soko hilo wakati alipotembelewa na waandishi wa habari kwa ajili ya kupata maoni ya wafanyabiashara baada ya maboresho yanayoendelea kwenye soko hilo.

Hapo awali soko hilo halikuwa na mazingira rafiki kwa wafanyabiashara hususani kipindi cha mvua lakini vibanda vya awali havikuwa rafiki kwao, kitendo kilichopelekea wafanyabiashara wengi kuondoka kwenye soko hilo na kwenda kufanya biashara kwenye maeneo yasiyorasmi ikiwemo maeneo ya barabarani.

Charles ameendelea kuipongeza Manispaa ya Ubungo kwa ushirikishwaji wa wafanyabiashara juu ya namna bora ya kuboresha soko hilo kwa kuzingatia mahitaji yao ambapo vibanda vilivyojengwa vinamuwezesha mteja kufika kwenye kila kibanda kutokana na jinsi vilivyojengwa kitendo ambacho kinapelekea mzunguko wa biashara kuwa mzuri.

Nae Ndg. Zainab Hassan mfanyabiashara wa soko hilo alisema uboreshaji wa soko hilo pamoja na kuweka mazingira mazuri kwa wafanyabiashara lakini pia utaiwezesha Manispaa kuongeza mapato yake kwani sasa kila siku tunashuhudia ongezeko la wafanyabiashara wakihitaji kupata vibanda vya kufanya biashara zao.

“Sisi kama wafanyabiashara kwa maboresho haya tupo radhi tena kwa hiari kulipa ushuru na kodi mbalimbali za Manispaa kwani tunaona matunda yake” alisema Zainab.

Kwa upande wake Ndg. Geofrey Mbwama Afisa Mfawidhi sehemu ya Biashara na Masoko Manispaa ya Ubungo amesema katika kutekeleza sera na maagizo ya Mhe. Rais wa awamu ya sita ya kuhakikisha masoko yanaboreshwa, Manispaa ya Ubungo inatekeleza kwa vitendo kwa kufanya uboreshaji wa masoko kwa kutumia fedha za mapato yake ya ndani na Serikali kuu.

Geofrey ameendelea kueleza kuwa kwa mwaka wa fedha 2023/2024 Manispaa ya Ubungo imeweza kutenga zaidi ya Bilioni 2 Fedha za mapato yake ya ndani kwa ajili ya uboreshaji wa masoko ikiwemo soko la Mabibo, soko la SIMU 2000, soko la Manzese na soko la Mbezi Shule kwa lengo la kuweka mazingira rafiki kwa wafanyabiashara.

Akielezea ujenzi wa vibanda vya Soko la SIMU 2000 Geofrey ameeleza kuwa Manispaa ya Ubungo kwa kutumia fedha za mapato yake ya ndani kwa awamu ya kwanza ilitenga kiasi cha shilingi milioni 100 kwa ajili ya uboreshaji wa vibanda vya soko hilo na jumla ya vibanda 170 vimejengwa na kwa awamu ya pili kiasi cha shilingi milioni 39 kilitengwa kwa ajili ya ujenzi wa vibanda 80 vya wafanyabiashara ambapo ujenzi upo asilimia 30 na utakamilika mwishoni mwa mwezi huu.

Akiongelea lengo la maboresho ya soko hilo Geofrey ameeleza kuboreshwa kwa soko hilo ni kuwezesha wafanyabiashara ndogondogo kuinua vipato vyao sambamba na kuongezeka kwa mzunguko wa biashara, kuwaweka wafanyabiashara pamoja kutokana na aina ya biashara zao na kuongeza mapato ya Manispaa kutokana na ushuru utakaotozwa kwenye vibanda hivyo.

Soko la SIMU - 2000 ni miongoni mwa masoko 13 yanayomilikiwa na Manispaa ya Ubungo ambalo lilianzishwa mwaka 2014 likiwa limejengwa vibanda 312 na baadae wafanyabiashara walihamishwa kutoka kwenye maeneo mbalimbali waliyokuwa wakifanyia biashara ambayo hayakuwa rasmi na kuhamishiwa sokoni hapo lakini walitelekeza vibanda vyao kutokana na hali iliyokuwa hapo awali.