UBUNGO KUJA NA VITAMBULISHO VYA WAFANYABIASHARA WADOGO VILIVYOBORESHWA

Posted on: March 7th, 2024

Manispaa ya Ubungo kupitia Idara ya Maendeleo ya Jamii imefanya kikao na viongozi wa wafanyabiashara ndogondogo wa Manispaa hiyo kilicholenga kuelezea mpango wa utoaji wa vitambulisho vilivyoboreshwa vya wafanyabiashara hao.

Akiongea Stella Juma Ngazija Mratibu wa wafanyabiashara ndogondogo amesema Serikali imeandaa mfumo wa utoaji vitambulisho kwa wafanyabiashara wadogo ambao ni machinga, madereva wa pikipiki na bajaji na mama na baba lishe unaopatikana kupitia anuani ya wbn.jamii.go.tz.

Stella ameendelea kueleza kuwa baada ya Serikali kuweka mazingira mazuri ya maeneo ya wafanyabiashara wadogo sasa imeweka mpango wa kutoa vitambulisho hivyo ambapo kila mfanyabiashara mdogo aliyethibitishwa atalipia kiasi cha Shilingi 20,000/= na kila baada ya miaka mitatu atahuisha kwa kiasi cha Shilingi 5,000/=

Aidha, Stella ameeleza kuwa kutolewa kwa vitambulisho hivi hakutaondoa ulipaji wa ada na tozo mbalimbali za kisheria zinazotozwa na TRA au Mamlaka za Serikali za Mitaa katika maeneo wanayofanyia biashara, pande zote mbili watakubaliana aina ya tozo, kiasi na jinsi ya kulipa ili kuwa na makubaliano ya pamoja.

Akielezea faida za vitambulisho hivyo Stella amesema kutambulika na mamlaka mbalimbali ikiwa ni pamoja na Mamlaka ya Mapato Tanzania (TRA), Jeshi la Polisi, Ofisi ya Mkurugenzi wa Halmashauri husika na Taasisi za Kifedha, kutambuliwa na kupata mikopo kutoka katika taasisi mbalimbali za kifedha hapa nchini, kukamilisha miamala mbalimbali ya malipo kwa njia ya kidijitali.

Faida zingine ni pamoja na kupewa kipaumbele cha kupata maeneo bora ya kufanyia biashara katika miundombinu ya masoko itakayokuwa imejengwa katika maeneo yao, kulipia huduma mbalimbali katika vituo vya kutolea huduma Nchini kama vile huduma za afya, bima mbalimbali, viwanja vya michezo, kuunganishwa na mifuko ya hifadhi ya jamii na kitasaidia kujua idadi ya wafanyabiashara ndogondogo katika maeneo husika ili kuendelea kutenga na kuendeleza/kuboresha miundombinu rafiki kwa ajili yao.