UBUNGO MANISPAA YAFANYA USAFI KUMUENZI BABA WA TAIFA

Posted on: October 14th, 2023

Katika kumuenzi Hayati baba wa Taifa Mwl. Julius Kambarage Nyerere  tarehe 14/10/2023 Manispaa ya Ubungo imefanya usafi katika soko la SIMU 2000 lililopo Kata ya Sinza.

Katika usafi huo wananchi, viongozi, wajasiriamali wa soko hilo na wadau mbalimbali wa mazingira walijitokeza na kushiriki usafi huo akiwemo HUDEFO na Vijana Fikiri Kidigitali.

Akiongea katika usafi huo Mkuu wa Kitengo cha mazingira na usafishaji wa Manispaa hiyo Ndg Lawi Bernard ameeleza kuwa ajenda ya usafi ni suala mtambuka ambapo kila mtu anawajibu wa kufanya katika kuhakikisha mazingira yanayomzunguka yanakuwa safi muda wote na hivyo kuzuia athari zinazoweza sababishwa na uchafu na kuharibu muonekano mzuri wa maeneo yetu.

Lawi ameendelea kueleza kuwa uwepo wa kampeni ya Kataa uchafu safisha pendezesha Ubungo inamlazimu kila mjasiriamali kuhakikisha anatunza mazingira sokoni hapo kwani katika kampeni hiyo masoko pia yatashindanishwa kwenye suala la usafi.

“Leo katika kumuenzi Hayati Baba wa Taifa mbali na uwepo wa masoko yote ndani ya Manispaa ya Ubungo tumeona kuja hapa soko la SIMU 2000 kushirikiana nanyi wajasiriamali katika kufanya usafi sokoni hapa naomba hii iwe desturi yenu endelevu kwani uwepo wa mazingira safi ya soko yatawezesha kuongeza thamani ya bidhaa zenu na hivyo kuvutia wateja na hatimae kuwa wawezesha kuwa washindi katika kampeni hii ya usafi” alisisitiza Lawi.

Nae, Meneja wa soko hilo Geofrey Mbwama ametoa kwa wajasiriamali hao kuhakikisha wanawajibika kwenye utunzaji wa mazingira ya soko hilo na atakae kiuka kwa kuchafua mazingira hatua za kisheria zitachukuliwa dhidi yake ikiwemo na kulipa faini isiyopungua elfu hamsini.

Kwa upande wake mwenyekiti wa kitengo cha matunda sokoni hapo Deo Brashi amewashukuru wadau wote kwa kushiriki zoezi la usafi sokoni hapo na kuahidi kuhakikisha kuwa wajasiriamali wote wa soko hilo wanashiriki kikamirifu katika utunzaji wa mazingira ya soko hilo.

Wananchi wakifanya usafi katika siku ya maadhimisho ya kumbukizi ya baba wa taifa Mwl.julius kamabarage nyerere