UBUNGO YAADHIMISHA SIKU YA UONI DUNIANI KWA UPIMAJI BURE WA MACHO ZAHANATI YA GOBA

Posted on: October 15th, 2025

Wakazi wa Ubungo wahimizwa kupima macho mara kwa mara kuepuka uoni hafifu

Na Twagile SangaGoba, Ubungo – Oktoba 15, 2025

Halmashauri ya Manispaa ya Ubungo imeadhimisha Siku ya Uoni Duniani kwa kutoa huduma ya Upimaji wa macho bure kwa wananchi, tukio lililofanyika leo katika Zahanati ya Goba.

Akifungua rasmi maadhimisho hayo, Mganga Mkuu wa Manispaa ya Ubungo, Dkt. Aristides Raphael amewataka wananchi kujenga utaratibu wa kufanya uchunguzi wa macho angalau mara moja kwa mwaka, ili kuepuka changamoto ya uoni hafifu au upotevu wa kuona unaozuilika.

“Magonjwa mengi ya macho hayaonyeshi dalili mapema. Kupima mara kwa mara huongeza uwezekano wa kugundua matatizo kabla hayajawa makubwa,” alieleza Dkt. Raphael.

Aidha, alisisitiza pia umuhimu wa wananchi kupima afya zao dhidi ya magonjwa yasiyoambukiza kama kisukari na shinikizo la damu, ambayo mara nyingi huathiri macho kwa njia zisizoonekana mapema.

Katika kuonyesha mshikamano wa kijamii, Dkt. Raphael amewashukuru wadau mbalimbali wa afya waliosaidia kufanikisha siku hiyo akiwataja kuwa ni: Vision Care Foundation, Eye Care International Hospital, Dr Agarwals Eye Hospital, Ona Eyes Care, CBM na Your Eyes.

Kwa upande wake, Mratibu wa Huduma za Macho wa Manispaa ya Ubungo, Bi. Joyce Riwa,  alieleza kuwa duniani kote, takribani watu bilioni 2.2 wanakabiliwa na matatizo ya uoni hafifu, na zaidi ya nusu yao wako barani Afrika.

“Kwa takwimu hizi, kupima macho ni jambo la lazima kwa kila mtu. Inashauriwa kupima angalau mara moja kwa mwaka ili kujikinga mapema,” alisema Bi. Riwa.

Hata hivyo amewataka wazazi kuwapeleka watoto wao kufanya uchunguzi wa macho kwani mtoto akipata tatizo la uoni linaweza kuathiri ujifunzaji shuleni na kushindwa kufurahia maisha ya kila siku na kumuweka katika matatizo ya afya ya macho siku za usoni.

Mmoja wa wananchi waliopata huduma hiyo, Ndugu Mwasiki Kahamara, ameishukuru Manispaa ya ubungo kwa kuratibu zoezi hilo la bure akisema limewafikia hata wale wasiokuwa na uwezo wa kifedha kupata huduma hiyo muhimu.