WANANCHI MSIGANI WAANZA KUNUFAIKA NA MAFUNZO YA KILIMO MJINI.

Posted on: August 29th, 2025

Wakulima katika kata ya Msigani, Manispaa ya Ubungo mkoani Dar es Salaam, wameanza kunufaika moja kwa moja na mafunzo ya kilimo mjini, yaliyotolewa na wataalamu wa kilimo kutoka halmashauri ya Manispaa ya Ubungo. 

Mafunzo hayo yaliyotolewa  August 29, 2025 yamehusisha mitaa yote mitano ya kata hiyo ambayo sasa wameanza kujifunza na kutekeleza kilimo cha mbogamboga majumbani, jambo ambalo wanaliona kama suluhisho la uhakika wa chakula na usalama wa kiafya kwa familia zao.

Wakizungumza katika mafunzo hayo, wakulima hao wamesema njia hii mpya si tu inawasaidia kupata mboga kwa urahisi, bali pia inawawezesha kutumia vifaa rahisi kama mifuko na makopo, hali inayosaidia kudhibiti upotevu wa maji na mbolea.

Katika hatua nyingine wakulima hao wameomba mafunzo hayo yawe endelevu ili kusaidia jamii kubwa zaidi kunufaika, wakisisitiza kuwa mafanikio ya kilimo mjini yatategemea mwendelezo na usimamizi wa karibu kutoka kwa wataalamu wa kilimo.

Afisa Kilimo wa kata ya Msigani, Bi Sauda Msangi, alieleza kuwa mafunzo hayo yameandaliwa kwa mara ya kwanza katika eneo hilo, tofauti na hapo awali ambapo wakulima walikuwa wanakutana na elimu hiyo mara moja tu kwa mwaka, wakati wa maonesho ya Nanenane.

Alifafanua kuwa aina hii ya kilimo inalenga kutumia maeneo madogo kuzalisha mbogamboga kwa tija, kwani maeneo ya mijini hayana nafasi ya mashamba makubwa. 

Kwa upande wake, Afisa Kilimo Mfawidhi wa Manispaa ya Ubungo, Bi. Editha Chilongani alisema anaamini wakulima waliopatiwa mafunzo wataweza kutekeleza kilimo hicho kwa vitendo kuanzia hatua ya kwanza hadi ya mwisho.

Alibainisha kuwa fedha zote na mahitaji mengine yametolewa na Mkurugenzi ili kuwezesha utekelezaji wa shamba darasa hili kwa vitendo.

Katika mafunzo hayo, wakulima walifundishwa namna ya kukata na kukunja mifuko, kuchanganya udongo na mbolea asilia pamoja na kujaza kwenye mifuko kwa usahihi, kabla ya kupanda mbegu.