WATUMISHI WAPYA UBUNGO WAPEWA MAFUNZO KUHUSU UTUMISHI WA UMMA NA KUTAKIWA KUZINGATIA WARAKA WA UTUMISHI WA UMMA WA MWAKA 2020

Posted on: January 20th, 2025

Watumishi wapya walioajiriwa katika halmashauri ya Manispaa ya Umma katika kada tofauti tofauti wametakiwa kufanya kazi kwa kuzingatia kanuni, Sheria, taratibu na miongozo inayoongoza utumishi wa Umma kwa uadilifu na pia kwa kutumia ubunifu unaoendana na mabadiliko ya matumizi ya TEHAMA ili kufikia malengo ya Taasisi na Serikali kwa ujumla.

Kauli hiyo imetolewa na Afisa Utumishi mkuu Bi. Upendo Haule alipokuwa akifungua mafunzo kwa watumishi hao, yaliyofanyika  tarehe 20 Januari 2025 katika ukumbi wa ofisi za Halmashauri ya Manispaa ya Ubungo.

Bi. Haule amesema Serikali imeweka kanuni na miongozo ili watumishi waweze kuhudumia wananchi kwa utaratibu, uaminifu, usawa, haki na uwazi, hivyo, “mkiwa watumishi wa umma mna jukumu la kuzingatia kanuni hizo katika utendaji wenu wa kila siku.”

Aidha, Bi. Haule alibainisha kuwa, kutokana na unyeti wa taarifa zinazoshughulikiwa kila siku, suala la usalama wa taarifa ni jambo la msingi ambalo halina mbadala wala mzaha kulizingatia kwa uadilifu na umakini wa hali ya juu.

“Ukiwa mtumishi wa Umma, Jiepushe na masuala ya siasa lakini pia zingatieni matumizi sahihi ya taarifa kwani ni wajibu wako kutunza taarifa za mteja wako ili usilete taharuki kwa jamii unayoihudumia”- Bi. Haule

Amesema wakiishi maisha yao itawasaidia kuepuka mikopo isiyoeleweka pia waishi Kwa kuzingatia upendo na kuepuka chuki kazini ili kazi ziweze kufanyika Kwa weledi.

"Niwaombe tuishi Kwa kupendana na kuacha kuchukiana bila sababu, tuishi Kwa upendo ili kazi iweze kufanyika vizuri" amesema Upendo.

Sambamba na hayo watumishi hao wametakiwa kutumia mitandao ya kijamii vizuri ili kuepuka kuweka mtandaoni vitu ambavyo ni kinyume na maadili ya utumishi wa umma ili kutoharibu taswira nzuri ya serikali na maadili yao kama watumishi wa umma.