UBUNGO YAKABIDHIWA MICHE 200 YA MIANZI KUTOKA KAMPUNI YA MAGODA BAMBOO

Posted on: November 13th, 2025

Katika jitihada za kuhifadhi mazingira na kuongeza wigo wa upandaji miti rafiki wa mazingira, Kampuni ya Magoda Bamboo Ltd imekabidhi miche ya mianzi 200 kwa Halmashauri ya Manispaa ya Ubungo ambayo itaenda kupandwa katika maeneo yote ambayo sio rafiki kwaajili ya kuzuia madhara yatakayotokana na mvua zinazoendelea kunyesha

Tukio hilo limefanyika tarehe 13 Novemba, 2025 katika viunga vya Manispaa hiyo na tukio hilo limehudhuriwa na  Afisa Mahusiano na Masoko wa kampuni ya Magoda Company  Ndg. Robert Muhando na Mkuu  wa idara ya Utawala na usimamizi wa rasilimali watu Ndg. Adolf Semindu pamoja na watumishi wa Idara ya Mazingira.

Akizungumza wakati wa makabidhiano  Ndg. Robert Muhando amesema kuwa zoezi hili ni sehemu ya mpango wa kampuni hiyo kusaidia juhudi za serikali katika kukabiliana na mabadiliko ya tabia ya nchi kupitia kampeni za upandaji miche endelevu. “Mianzi ni aina ya mmea unaokua kwa haraka, unaoweza kutumika kwa matumizi mbalimbali na pia una mchango mkubwa katika kuhifadhi udongo na kupunguza hewa ukaa,” amesema.

Kwa upande wa Manispaa Mkuu wa Idara ya Utawala na Usimamizi wa Rasilimali watu alitoa shukrani kwa Magoda Bamboo Company kwa mchango wao, akisisitiza kuwa miti hiyo itapandwa katika pembe za mto kibwegere uliopo mpigi  ndani ya Manispaa ya Ubungo. “Tunathamini ushirikiano huu ambao unachochea maendeleo endelevu na kulinda mazingira yetu kwa manufaa ya vizazi vijavyo,” aliongeza.

Miche hii ya mianzi inatarajiwa kupandwa katika muendelezo wa mradi huu,  ikiwa ni moja ya ushirikiano wa muda mrefu kati ya sekta binafsi na serikali katika kulinda mazingira.